Республика көнендә Рөстәм Миңнеханов Казанда яңартылган ишегалларының берсен карады
Татарстан Рәисе Рөстәм Миңнеханов Республика көнендә Казанның Рихард Зорге урамында бер ишегалдын карады. Аның территориясе «Безнең ишегалды» программасы буенча төзекләндерелгән. Бу хакта Татарстан Рәисе Телеграм-каналында язды.
«Казанлылар өчен Шәһәр көненә һәм Республика көненә яхшы бүләк», - диде Рөстәм Миңнеханов.
Республика җитәкчесе матбугат хезмәте билгеләп үткәнчә, ТР Рәисе Казан мэры Илсур Метшин белән Рихард Зорге урамында 93, 93а һәм 95нче йортларның яңартылган ишегалды территорияләрен карап чыкты.
«Кадерле дуслар, бүген без бу йортларда яшәүчеләргә хезмәт итәчәк ишегалларына килдек. «Безнең ишегалды» программасы инде 5 ел эшли. Без әлеге программаның никадәр кирәклеген һәм аның үз ишегалдына халык - балалар да, өлкәннәр дә җыела алырлык итеп эшләргә ярдәм итүен күрәбез», — диде Рөстәм Миңнеханов, йортларда яшәүчеләр алдында чыгыш ясаганда.
«Шуңа күрә үз ишегалдыгызны саклагыз! Чөнки чынлыкта төзекләндерү һәм хезмәт күрсәтү - бу аз акча түгел. Ләкин иң мөһиме - үзегезне саклагыз! Сездән башка ишегалды буш булачак. Һәм сез һәрвакыт бирегә зур теләк белән килсәгез иде. Барыгызны да бәйрәм белән! Уңышлар һәм сәламәтлек!» - дип белдерде Татарстан Рәисе.
Миңнеханов, Метшин һәм башка кунаклар төзекләндерелгән ишегалларын һәм скверны карады. Территориягә өстәлләр куелган, аларда өстәл уеннары уйнарга була, балаларга «Синең яшел гадәтләрең» экологик программасы турында сөйләделәр. Мәктәпкәчә яшьтәге балалар өчен җимлекләр ясау һәм рәсем ясау буенча мастер-класслар оештырылды. «Әкият» курчак театры анимация белән тәэмин итте.
Болардан тыш, республика җитәкчесенә Татарстан шәһәрләрендә һәм район үзәкләрендә «Безнең ишегалды» программасының ничек гамәлгә ашырылуы турында сөйләделәр. Рөстәм Миңнеханов шулай ук якындагы күп фатирлы йортлардан бәйрәмгә килүчеләр белән аралашты.
2019 елда Татарстан ишегалларын төзекләндерү буенча киң күләмле программаны ТР Рәисе Рөстәм Миңнеханов тәкъдиме белән башлап җибәрделәр. Аның кысаларында республикада 7 меңгә якын ишегалды төзекләндереләчәк.
Күптән түгел Татарстан «Ишегалларын төзекләндерү программаларын гамәлгә ашыру буенча иң яхшы төбәк» номинациясендә уңайлы шәһәр мохитен формалаштыру өлкәсендә I Илкүләм премия җиңүчесе булды. Премия «Торак һәм шәһәр мохите» илкүләм проекты составына кергән «Уңайлы шәһәр мохитен формалаштыру» Федераль проекты кысаларында оештырылды (башка илкүләм проектлар кебек үк, РФ Президенты Владимир Путин инициативасы белән).