Мэрия бинасы балконнарында «Казан тавышлары» тамашасы була

Казан мэриясе бинасы балконнарында 24 августта «Голоса Казани – Казан тавышлары» театральләштерелгән тамаша узачак. Шәһәр халкы һәм кунаклары алдында Казан театрлары актерлары, вокалчылар һәм музыкантлар чыгыш ясаячак. Бу турыда мэриянең матбугат хезмәте хәбәр итте.

Башкарма комитеты җитәкчесе урынбасары Гүзәл Сәгыйтова сүзләренчә, тамаша Россиядә 2024 елда игълан ителгән Гаилә елына багышлана. Башлана 20:30 сәгатьтә.

«Тамашаның төп герое — дөнья мәхәббәттән үрелгән дигән төшенчәгә чын күңелдән ышанган шагыйрь-сәяхәтче. Ә менә аңа каршы герой — физик галим — барысы да фәнгә генә буйсына, ә җирдә мәхәббәт бөтенләй юк, дип раслый. Бу бәхәстә хакыйкатьне безгә ачыкларга туры киләчәк», — диде ул сюжет турында.

24 августта, Мәрҗани урамында «Печән базары» эшли башлый. Фестивальдә заманча татар мәдәниятен тәкъдим итүче дизайнерлар, шагыйрьләр һәм музыкантлар үзләренең иҗаты белән уртаклаша. Чара Бөтендөнья татар яшьләре форумы ярдәмендә оештырылды.

Бу атнада «Безнең ишегалды тавышы – безнең команда тавышы» дигән район конкурсын сайлап алу башлана. Финал 27 августка планлаштырылган. Гүзәл Сәгыйтова ачыклык керткәнчә, җиде ел эчендә биш яшьтән алып 85 яшькә кадәрге 5 мең казанлы катнашкан. Конкурсның җәдвалын һәм узачак урынын район администрацияләренең социаль челтәрләрендә белергә мөмкин.