Яшел Үзәндә Алтынов паркының икенче чиратын ачтылар
Яшел Үзәндә Алтынов паркының икенче чиратын ачтылар. Чарада РФ Дәүләт Думасы депутаты Илдар Гыйльметдинов, ТР сәнәгать һәм сәүдә министрының беренче урынбасары Родион Карпов, Яшел Үзән мэры Михаил Афанасьев, чакырылган кунаклар булды. Бу хакта «Яшел Үзән» сайты Яшел Үзән муниципаль районы матбугат хезмәтенә сылтама белән хәбәр итә.
Бәйрәм кунаклары өчен эчтәлекле программа әзерләнгән иде: мастер-класслар белән тематик мәйданчыклар, спорт ярышлары, мототехника күргәзмәсе.
«Республика көнендә Советлар Союзы Герое Николай Алтынов паркын ачабыз. Бүген безнең шәһәрдә яңа, уңайлы, заманча иҗтимагый киңлек барлыкка килде. Монда теләсә кайсы яшьтәге кешеләргә һәм кунакларга ял итү өчен барлык шартлар да тудырылган», - диде Михаил Афанасьев.
Территорияне төзекләндерү, беренче чиратта, ял итү, спорт һәм көндәлек тормыш өчен шартлар тудыруга юнәлдерелгән. Проект инклюзив киңлеккә нигезләнгән, биредә халыкның аз мобиль төркемнәренең ихтыяҗларын исәпкә алганнар.
Паркта уңайлы маршрутлар һәм матур күп баскычлы киңлек барлыкка килгән. Территорияне артык антропоген йөкләнештән саклауга аерым игътибар бирелгән.
Монда актив һәм пассив ял итү зоналары, балалар мәйданчыклары, табигатьтә ял итү урыннары, этләрне йөртү зонасы бүлеп бирелгән.
Искәртик, 2022 елда Алтынов паркы кече шәһәрләрдә һәм тарихи җирлекләрдә уңайлы шәһәр тирәлеге булдыру бөтенроссия бәйгесендә җиңү яулады.