Метшин ТР ведомстволары, шәһәр-район башлыкларының медианәтиҗәлелек рейтингын җитәкләде
Казан мэры Илсур Метшин 2024 елның өченче кварталы өчен Татарстан Республикасы министрлык һәм ведомстволары, шәһәр һәм район җитәкчеләренең медианәтиҗәлелек рейтингында беренче баскычта урнашты. Тикшеренүне «ПромРейтинг» агентлыгы үткәргән.
Метшин өченче квартал нәтиҗәләре буенча 6492 балл җыйды һәм бу аңа лидерлыкны саклап калырга мөмкинлек бирде. Искәртеп узабыз, Казан мэры моннан алдагы рейтингта да беренче баскычны биләгән иде.
15 ноябрьгә кадәр Әлмәт районын җитәкләгән ТР Рәисе ярдәмчесе Тимур Нагуманов рейтингның икенче баскычында урнашты. Ул 2682 балл җыйды һәм бу аңа бер квартал эчендә алты баскычка күтәрелергә мөмкинлек бирде.
Россия Тикшерү комитетының ТР буенча идарәсе җитәкчесе Валерий Липский, 2155 балл туплап, өченче урынны алды. Узган рейтинг белән чагыштырганда, ул өч позициягә югары күтәрелде.