Малайзия Премьеры Европада мөселманнарга каршы гамәлләр артуга борчыла
Европада мөселман җәмгыятьләренә каршы юнәлдерелгән максатчан гамәлләрнең үсеше күзәтелә. Бу хакта «Россия — Ислам дөньясы» Стратегик караш төркеменең күчмә утырышында Малайзия Премьер-министры Әнвәр Ибраһим белдерде.
Ибраһим Европада мәчетләрне мәсхәрә итүләр, мөселманнарны эзәрлекләү турында да искәртте.
Икенче яктан караганда, мөселман дөньясының һәм Россиянең төрле өлкәләрдә хезмәттәшлек темплары арта.
«Малайзия – ислам финанслары өлкәсендә дөньякүләм лидер. Без шәригать таләпләренә җавап бирә торган һәм финанс инновацияләрен стимуллаштыра торган институтларның ышанычлы экосистемасын булдырдык. Россия үзенең шактый күп мөселман халкы белән ислам банкингы өстенлекләрен кулланырга әзер. Бу уртак проектларга ярдәм итә һәм мөселманнар күп булган илләрдән инвестицияләр җәлеп итә», – диде Малайзия Премьер-министры.
Ул гаделлек һәм күпполярлылык ышанычтан һәм бердәмлектән башка була алмый, диде.
«Бу очрашу диалог өчен мөмкинлек кенә түгел, ә эшләргә өндәмә дә. Бу безнең миссияне башкару мөмкинлеге», – дип ышана Премьер.
Россия һәм мөселман дөньясы илләре арасында хезмәттәшлекне ныгытуда Стратегик караш төркеме рәисе, Татарстан Рәисе Рөстәм Миңнеханов та әһәмиятле роль башкарды, диде Әнвәр Ибраһим.
«Татарстан Республикасы Рәисе, Татарстанның бөтен халкы кебек үк – кыю кеше», – диде Әнвәр Ибраһим.