Эмиль Талипов яңа бинага күченү турында: «Туган йорттан аерылу бик авыр бит»

«Ул татар театрына өр-яңа ташкын булып кергән, искиткеч талантлы, чын интеллигент, бүгенгенең популяр артисты. Ул берсеннән-берсе кызыклы рольләрне коеп кына торды. Татарстанның атказанган артисты, М.Җәлил премиясе лауреаты Эмиль Талипов», – дип таныштырды «ТНВ» каналында «Сөйләшергә вакыт» тапшыруын алып торучы Лилия Кадыйрова.

Әлбәттә, сүз башы Камал театрының яңа бинасы турында булды. «Без шундый хәлдә әле – яңа театрга күчүне көтеп ятабыз. Күченү белән күченмәү арасында. Шуңа күрә ничектер төпләнеп эшләп китеп тә булмый әле. Күчеш дулкынландыра бераз», – ди Эмиль Талипов.

Л.К.: Нәрсә көтәсез яңа театр бинасыннан?

Э.Т.: Дөресен әйтергә кирәк – туган йорттан аерылу бик авыр бит. Әлеге бинаны яратам, һәрбер артист шулайдыр дип уйлыйм. Менә без 1 бүлмәле фатирда 5 кеше яшәдек. Аннары йортлар салдык, күчендек. Ләкин иң рәхәт чагым, кайгысыз вакытым – бәләкәй, без көчкә сыеша торган шул фатирда булганын аңладым. Театр белән дә шулай. Ләкин күнегербез, безгә инде хәзер таләпләр зур. Яңа театрга күчкәч, яңа дәвер башланып китәргә тиеш. Инде күченеп йөрергә язмасын, дим. Монда күченик тә, төпләник тә, татар театрның яңа этабы башланып китсен иде. Чөнки театр гына үзгәрми калмас, бүгенге көндә бөтен дөнья үзгәрә.