Քննարկում ենք ՀԱՄԱՍ-ի առաջնորդներին արտաքսելու հարցը. Նեթանյահու
Իսրայելի վարչապետ Բենիամին Նեթանյահուն հարցազրույց է տվել ամերիկացի լրագրող Դեն Սինորին և, ի թիվս այլ բաների, խոսել է «պատերազմի հաջորդ օրվա» մասին:
«Մենք քննարկում ենք ահաբեկչական կազմակերպության առաջնորդներին արտաքսելու հարցը, բայց դա կախված է, առաջին հերթին, ՀԱՄԱՍ-ի հանձնումից», - ասել է Նեթանյահուն:
Նա հույս է հայտնել, որ պատերազմից հետո Գազայի հատվածը կկառավարեն ՀԱՄԱՍ-ի հետ կապ չունեցող տեղացիները՝ տարածաշրջանի երկրների պաշտոնական ներկայացուցիչների հետ:
«Մենք հուսով ենք, որ անկլավը կկառավարեն ՀԱՄԱՍ-ի հետ կապ չունեցող տեղի բնակիչները՝ տարածաշրջանի երկրների հետ:Մեզ հարցնում են, թե ինչ է լինելու «հաջորդ օրը», բայց առաջին հերթին պետք է վերացնել ՀԱՄԱՍ-ը։ Տեղի Գազայի բնակիչներին չի կարելի թույլ տալ կառավարել տարածքը, քանի դեռ ՀԱՄԱՍ-ն այնտեղ է: Մենք պետք է պաշտպանվենք մեր ուժերով: Մենք դա չենք խնդրում ամերիկացի զինվորներից կամ ուրիշներից»,- ասել է Նեթանյահուն:
Իսրայելի վարչապետը վստահություն է հայտնել, որ իրենք «կոչնչացնեն ՀԱՄԱՍ-ը»:
«Մեր երկրորդ նպատակը պատանդներին վերադարձնելն է, դա է մեր նպատակը, և դրա համար էլ մենք ռազմական ճնշում ենք գործադրում։ Մենք կանգնած ենք մարտահրավերների առաջ, որոնց ոչ մի ժամանակակից բանակ նախկինում չի հանդիպել», - եզրափակել է նա: