Շոլցը պատմել է, որ ամեն օր SMS հաղորդագրություններ է ուղարկում Մակրոնին
Գերմանիայի կանցլեր Օլաֆ Շոլցն ասել է, որ ամեն օր աջակցության խոսքերով SMS հաղորդագրություններ է ուղարկում Ֆրանսիայի նախագահ Էմանուել Մակրոնին՝ խորհրդարանական ընտրությունների առաջին փուլում «Միասին հանուն Հանրապետության» նախագահական կոալիցիայի պարտությունից հետո։ Այս մասին գրում է spiegel.de կայքը:
«Ամեն դեպքում, ես մատներս խաչած եմ պահում, որ ֆրանսիացի ժողովուրդը, որին ես այնքան շատ եմ սիրում և գնահատում, և երկիրը, որն ինձ համար այդքան կարևոր է, կարողանա կանխել աջ պոպուլիստի գլխավորած կուսակցության կողմից կառավարության ստեղծումը»,- ասել է կանցլերը:
Աղբյուրը նկատում է, որ որպես կանոն, Գերմանիայի կանցլերները չեն մեկնաբանում այլ երկրներում ընտրությունները։
Ֆրանսիայի ՆԳՆ պաշտոնական տվյալների համաձայն՝ խորհրդարանական ընտրությունների առաջին փուլում ծայրահեղ աջակողմյան հայացքների տեր «Ազգային միավորում» կուսակցությունն իր դաշնակիցների հետ հավաքել է ձայների 33,15 տոկոսը, ձախակողմյան «Նոր ժողովրդական ճակատ» կոալիցիան ստացել է 27,99 տոկոսը, իսկ նախագահ Էմանուել Մակրոնի կոալիցիան 20 տոկոս ցուցանիշով երրորդն է: