Татарстан эзләү отряды Ленинград өлкәсенә экспедициягә киткән

1 июльдә 55 кешедән торган төркем Ленинград өлкәсенең «Невский пятачок» плацдармы районында эзләү экспедициясенә юл тоткан. Төркемдә Татарстан Республикасыннан мәктәп укучылары, укытучылар һәм өлкән эзләүчеләр бар. Бу хакта Татарстан Республикасының Санкт-Петербург шәһәре һәм Ленинград өлкәсендәге даими вәкиллеге хәбәр итә.

8 июльдә Татарстан Республикасының Даими вәкиле вазифаларын вакытлыча башкаручы Шамил Шәяхмәтов «Невский пятачок» плацдармында булган, эзләүчеләр белән аралашкан. Татарстан Республикасының Санкт-Петербург шәһәре һәм Ленинград өлкәсендәге даими вәкиллеге традицион рәвештә республика эзләүчеләренә экспедицияне үткәрүдә ярдәм күрсәтә.

Ике ел элек Татарстанның җыелма эзләү отряды әгъзалары Кировск шәһәре читендә, «Невский пятачок» тирәсендә Ленинградны яклаган җиде совет солдатының мәетен тапкан. Сигез дистә ел дәвамында гаиләләрендә аларның язмышы турында белмиләр, чөнки солдатлар хәбәрсез югалган дип санала.

Һәлак булганнарның икесенең медальоны булган, аның ярдәмендә исемнәрен билгели алганнар. Ике ел дәвамында хәрби архивларда эзләүләр нәтиҗә бирә: Аверин (Оерин) Иван Кузьма улы (1918 елда туган) һәм Биденко Сергей Петр улы (1919 елда туган), дошманга Ленинград шәһәрен басып алырга юл куймыйча, 1942 елда батырларча һәлак булган. Бу хакта эзләүчеләр солдатларның туганнарына хәбәр иткән.

2024 елның 8 июлендә Бөек Ватан сугышы геройлары һәлак булган урында солдатларның исемнәре теркәлгән мемориаль билге урнаштырылды, диелә хәбәрдә.

Шул ук көнне Татарстаннан «Хәтер вахтасы – 2024»тә катнашучылар киләчәк буыннарга Туган илебезне ата-бабаларыбыз яратканча яратырга һәм якларга, дигән юллама белән капсула салган.