Թոմաս Մյուլերը պաշտոնապես ավարտել է կարիերան Գերմանիայի հավաքականում
Պատմության մեջ ամենաշատ պարգևատրված գերմանացի ֆուտբոլիստ Թոմաս Մյուլերը պաշտոնապես ավարտել է կարիերան Գերմանիայի հավաքականում: Այս մասին գրում է Bild-ը:
Եվրոպայի առաջնության քառորդ եզրափակչի Իսպանիայի դեմ խաղում 34-ամյա Թոմաս Մյուլերի 131-րդ ելույթը վերջինն էր։
«Դա հավանաբար իմ վերջին միջազգային հանդիպումն էր: Դրանից հետո ես կնստեմ բանակցությունների սեղանի շուրջ ազգային հավաքականի մարզչի հետ։ Մենք շատ վստահելի հարաբերություններ ունենք: Բայց, ինչպես ասացի, իրականում դա (կարիերան հավաքականում ավարտելը) միանգամայն հնարավոր է»,- խաղից անմիջապես հետո ասել էր Մյուլերը։
Ինչպես հայտնի է դարձել Bild-ին, խաղից մի քանի օր անց Մյուլերը որոշել է ավարտել կարիերան Գերմանիայի հավաքականում։ Միևնույն ժամանակ նա կշարունակի հանդես գալ Մյունխենի «Բավարիա»-ում. նրա պայմանագիրը նախատեսված է մինչև 2025 թվականը:
Գերմանիայի հավաքականի կազմում իր նորամուտը Մյուլերը նշել է 2010 թվականի մարտին Արգենտինայի դեմ ընկերական խաղում։ Հարձակվող կիսապաշտպանը 131 խաղում դարձել է 45 գոլի հեղինակ: Մյուլերն իր ամենամեծ հաջողությունը գրանցել է 2014 թվականին Բրազիլիայում կայացած աշխարհի առաջնությունում. այն ժամանակ Գերմանիան հաղթել է մրցաշարը, Մյուլերն ընդհանուր առմամբ հինգ գոլ է խփել։