Արաբկիրի թաղապետարանի հետ կապված քրեական գործերով քաղաքական թիրախ չկա. Տիգրան Ավինյան
Որպես քաղաքապետ իմ ակտիվությունը պարտադիր է, մենք ունենք նախընտրական ծրագիր, որով գնացել ենք ընտրությունների և մենք, այդ նախընտրական ծրագրից ելնելով, քայլեր ենք իրականացնում:
Հրավիրված ասուլիսին ասել է Երևանի քաղաքապետ Տիգրան Ավինյանը՝ անդրադառնալով դիտարկմանը, թե իր ակտիվությունից տպավորություն է, թե քաղաքական ընտրապայքարի է պատրաստվում:
Ավինյանը՝ անդրադառնալով քաղաքապետարանի աշխատակիցների, մասնավորապես Արաբկիր վարչական շրջանի ղեկավարի կալանավորմանը կոռուպցիայի համար, նշել է, որ չի սիրում գնահատականներ տալ ընթացիկ գործերին։
«Վստահաբար, ժամանակը ցույց կտա՝ ճիշտ է, թե սխալ: Կոռուպցիայի կանխարգելման տեսանկյունից առաջին պատասխանատվությունը կառույցի ղեկավարինն է, և մեզ մոտ կադրային փոփոխություններ տեղի են ունեցել որոշ դեպքերում հենց այդ նկատառումներից ելնելով»,- ասաց նա։
Ըստ նրա՝ իրավապահների պատասխանատվությունն էլ պետք է լինի փաստով արձանագրված դեպքերի մասին:
«Ես հուսով եմ՝ իրավապահ համակարգը նույնպես պատասխանատվության չափը գիտակցում է։ Այսինքն՝ ամեն անգամ, երբ այս կամ այն մարդուն մեղադրանք է առաջադրվում, հետո որոշակի հարցեր ու խնդիրներ են առաջադրվում, դա էլ է խնդիր»,- ասաց նա:
Քաղաքապետը հույս է հայտնել, որ իրավապահ համակարգն ինչ-որ մի փուլում կդառնա այն ինստիտուտը, որ կոռուպցիայի տեսանկյունից վերջին օղակը կփակի։
«Ոչ մի դեպքում այս գործերով քաղաքական թիրախ չկա ու չի կարող լինել։ Ես ձեզ վստահեցնում եմ դա»,- ասել է նա։