Казанда Россия һәм Кытай галимнәре дала Евразиясен өйрәнү мәсьәләсе турында сөйләшәчәк
Киләсе елда Казанда Россия һәм Кытай галимнәре дала Евразиясе тарихын өйрәнү темасына багышланган тикшеренүләренең нәтиҗәләре белән уртаклашачак. Бу хакта «Татар-информ»да узган матбугат очрашуында ТР Фәннәр академиясенең Альберт Халиков исемендәге Археология институты директоры Айрат Ситдыйков хәбәр итте, дип яза «Татар-информ» хәбәрчесе Арсений Кәримов.
«[Татарстан Фәннәр академиясе президенты] Рифкать Миңнеханов катнашындагы фикер алышу барышында Россия һәм Кытай галимнәренең очрашуын оештыру кирәк булуы билгеләнде. Без дала Евразиясе тарихын, мәдәниятен, археологиясен, этнографиясен өйрәнү темасына халыкара конференцияне киләсе елның апреленә планлаштырдык», - дип аңлатты спикер.
Ул искәрткәнчә, узган ел Татарстан Республикасы Фәннәр академиясе каршында дала Евразиясен өйрәнү үзәге булдырылган, ул зур халыкара проектларны гамәлгә ашырырга мөмкинлек бирә. Шундый масштаблы тикшеренүләрнең берсе инде башланган.
«Бу мәсьәләдә Урта Идел буенда төрки дәүләтләр төзегән беренче шәһәрләрнең берсе булган Болгар аерым роль уйный, бу аны тикшеренүчеләр өчен тагын да кызыклырак итә», – дип йомгаклады Айрат Ситдыйков.
Кытай белән хезмәттәшлек дала Евразиясе тарихы буенча тикшеренүләрне киңәйтергә мөмкинлек бирә, чөнки Кытай Халык Республикасында бик күп язма чыганаклар бар, дип өстәде Татарстан Республикасы Фәннәр академиясенең Шиһабетдин Мәрҗани исемендәге Тарих институты директоры Радик Салихов.
«Тарихчылар буларак безне чыганаклар базасы кызыксындыра. Кытай архив саклагычларында бик күп язма чыганаклар бар, без аларны өйрәнмәгән. Без тарихыбыздагы күп кенә вакыйгаларга ачыклык кертә алабыз. Тарихның билгеле бер чорларында бер этномәдәни киңлектә булуыбызны аңларга кирәк. Бу зур дөнья тарихы, аннан башка заманча Россия цивилизациясен аңлау мөмкин түгел», - дип ассызыклады ул.
«Кытай галимнәре, үз чиратында, Идел буе тарихы турында бик аз мәгълүматка ия, шуңа күрә Татарстан белән хезмәттәшлек ике як өчен дә нәтиҗәле булырга тиеш», – дип ышана Минцзу исемендәге Кытай университетының Археология үзәге җитәкчесе, тарих фәннәре докторы, профессор, Кытай университетының атказанган профессоры Вэй Цзянь.