Татарстанда ярты ел эчендә ислам банкингы буенча килешүләр саны ике тапкыр арткан
Татарстанда 2024 елның беренче яртыеллыгында ислам банкингы алымнарын кулланып 2,8 миллиард сумлык 1255 килешү төзелгән. ТР Икътисад министрлыгы каршындагы партнерлык (ислам) финанславы бүлеге җитәкчесе Руслан Хәлиуллин «Татар-информ» агентлыгында узган матбугат конференциясендә шулай дип белдерде.
«Эксперимент үткәрү турында федераль закон кабул ителгәннән соң базарда активлык шактый артты. Татарстанда 2024 елның беренче яртыеллыгында төзелгән килешүләр саны ике тапкыр күбәйде. Операцияләр күләме 215 процентка артты», - диде спикер.
Партнерлык финанславы буенча эксперимент узган елның сентябрендә башланды. Ул дүрт сынау төбәгендә – Татарстан, Башкортстан, Дагыстан һәм Чечняда үткәрелә.
Хәлиуллин сүзләренчә, хәзерге вакытта Россия Банк реестрында әлеге экспериментта катнашучы 22 компания бар. Шуларның 16сы Татарстанда тәкъдим ителгән.
Спикер билгеләп үткәнчә, Россиядә беренче тапкыр Татарстанда әлеге экспериментны үткәрү вакытында берничә яңа продукт (проект финанславы, кече бизнес субъектларын ташламалы финанслау, партнерлык финанславы нормалары буенча лизинг) булдырылган. Моннан тыш, партнерлык финанславын кулланып, финанслауда электрон сәүдә мәйданчыгы эшли.