«Бердәм Россия» Казанда Татарстан Дәүләт Советына сайлау буенча пикет кампаниясе үткәрә

3 августтан 6 сентябрьгә кадәр «Бердәм Россия» Татарстанда ТР Дәүләт Советына депутатлар сайлау буенча пикет кампаниясе үткәрә. Бүген Лев Гумилев һәйкәл-бюсты (Петербург урамы) һәм «Казан-2» вокзалы («Төньяк вокзал» метро станциясе) янында ике пикет уза, дип яза «Татар-информ».

«Бердәм Россия» партиясе алдан тавыш бирү, сайлауга барачак кандидатлар буенча алдан сайлап алу үткәрде инде. Агитация чоры башланды: Татарстан Республикасы буйлап автобус турлары, мобиль агитация бригадалары йөри, ә Казанда бүген пикет программасы ачыла», - диде «Татар-информ» агентлыгы хәбәрчесенә «Бердәм Россия»нең Казан җирле бүлеге башкарма секретаре, ТР Дәүләт Советы депутаты Ольга Воронова.

Татарстанда 70 пикет ноктасы бар, шуның 16сы Казанда урнашкан. Алар шәһәр һәм авылларның кеше иң күп йөри торган урыннарында оештырыла. Пикет нокталары өч көн эшли, аннары урынын үзгәртә.

Һәр палатка янында икешәр волонтер-агитатор эшли, алар ТР Дәүләт Советына сайлау һәм «Бердәм Россия»дән күрсәтелгән кандидатлар хакында сөйли. Волонтерлар кулында – партия лафлетлары. Кандидатлар һәм партиянең якындагы биш елга өстенлекләре турындагы мәгълүматтан тыш, аларда QR-код та урнаштырылган, аның буенча кандидатка сорау бирергә мөмкин.

Ольга Воронова «Татар-информ» агентлыгына белдергәнчә, бу программа буенча Казаннан аена уртача 30га якын сорау килә.

«Кемдәдер лифт ватылган, кайдадыр юл ремонтланмаган», - ди депутат.

2024 елның 8 сентябрендә җиденче чакырылыш республика Дәүләт Советы депутатларын сайлау, шулай ук 38 муниципаль берәмлектә җирле үзидарә органнары депутатларын өстәмә сайлау була.

Илле депутатны – партия исемлекләре, тагын иллесен бермандатлы округлар буенча сайлыйлар. Сайлауда катнашу өчен 427 кеше кандидатурасын күрсәтте: 179 кеше – бердәм республика округы буенча, 248 кеше – бермандатлы округларда.

Татарстан парламенты депутатларын сайлауда барлыгы алты сәяси партия катнаша. Биш партия («Бердәм Россия», КПРФ, «Гадел Россия – Патриотлар – Дөреслек өчен», ЛДПР һәм «Яңа кешеләр») бердәм округ буенча да, бермандатлы округларда да кандидатлар күрсәтте.

Тагын бер партия - «Гражданнар инициативасы» - берничә бермандатлы округта үз кандидатларын тәкъдим итте. Моннан тыш, бермандатлы округларда 12 кеше үзен-үзе күрсәтте. Хәзерге вакытта кандидатларны теркәү процессы бара.