Ринат Садыйков: Быел «Сәләт»кә 30 ел тула – бу зур уңыш

Биләрдә «Сәләт» Халыкара яшьләр белем бирү форумының заманча медиаресурсларга багышланган Медиа Биләр Форумының бишенче сменасы төгәлләнде. Анда Самара, Оренбург, Мәскәү өлкәләреннән, Чувашия, Башкортстан, Санкт-Петербургтан һәм Татарстанның барлык районнарыннан барлыгы 823 бала катнашкан. Бу хакта республиканың Яшьләр эшләре министрлыгы хәбәр итә.

«Без Татарстанда «Сәләт» берләшмәсе булу белән бәхетле. Монда республиканың бөтен районнарыннан да балалар җыелды. Мин сезне дә бәхетледер дип ышанам, чөнки сезнең ел саен монда килү мөмкинлеге бар. Мин сезгә Татарстан Рәисе Рөстәм Миңнехановтан сәлам тапшырам», – диде Татарстанның яшьләр эшләре министры Ринат Садыйков смена ябылу тантанасында.

Сменада фән олимпиадалары, фәнни конференцияләр җиңүчеләре һәм призерлары, «Сәләт»нең төбәк клублары лидерлары һәм Татарстан районнарыннан һәм мәктәпләреннән активистлар катнашты. Алты көн дәвамында катнашучылар контент ясау үзенчәлекләре, журналистика, фото һәм видео, трендлар турында өйрәнде, реклама ясап карады, креатив фикерләү сәләтен үстерде, блогингка һәм социаль челтәрләр алып барырга өйрәнде.

Көн саен белем бирү һәм уен дәресләре, спорт ярышлары һәм мәдәни кичәләр уздырылды. «ГаләмФест» видеокиче узды, футбол, волейбол, стритбол, шахмат чемпионатлары, джем-сессияләр узды.