Башкортстанда яңгыр сәбәпле печәнсез калган хуҗалыкларга ярдәм күрсәтеләчәк

Башкортстан башлыгы Радий Хәбиров явым-төшем күп булган авыл районнарында яшәүчеләрнең печән әзерли алмавына борчылуын белдерде. Әгәр кешеләргә бу вәзгыятьтә ярдәм итмәсәң, алар кыш көне азыксыз калып, терлекләрен чалырга мәҗбүр булачак. Бу хакта «Башинформ» хәбәр итә.

Бу мәсьәләне Радий Хәбиров Төбәкләр белән идарә үзәгендә Хөкүмәтнең оператив киңәшмәсендә күтәрде, ул район башлыклары проблеманы хәл итү буенча мөрәҗәгать итә башлаганнарын әйтте. Проблемалы зоналар буларак, Бөрҗән, Салават, Баймак һ.б. районнар күрсәтелгән.

«Авылда кешеләр печән җыя алмый. Кышка печәнсез керерләр дигән куркыныч бар. Яңгырлардан зыян күргән муниципалитет башлыкларыннан, бәла-каза дәрәҗәсен аңлавыгызны һәм бу мәсьәләдә кешеләргә ничек ярдәм итә алуыбызны хәл итүегезне сорыйм», - диде Радий Хәбиров.

Башкортстан башлыгы үз администрациясе җитәкчесе Максим Забелинга һәм вице-премьер - авыл хуҗалыгы министры Илшат Фазрахмановка бу эшкә кушылырга кушты. Яңгырдан зыян күргән районнарда яшәүчеләргә печән сатып алу өчен кирәкле сумма буенча ике атна эчендә карар кабул ителәчәк, мондый ярдәм күрсәтүнең механизмы да билгеләнәчәк.