Табиблар һәм укытучылар өчен салым акчасын кайтару проекты тәкъдим ителде

«Гадел Россия - Дөреслек өчен» фракциясе депутатлары партия лидеры Сергей Миронов белән Дәүләт Думасына социаль һөнәр вәкилләре өчен салым акчасын кайтару турында яңа закон проектын кертте. Документ Дума электрон базасында бар. Бу хакта РИА Новости хәбәр итә.

«Закон проекты белән Россия Федерациясе субъектларының закон чыгару (вәкиллекле) органнарына медицина һәм мәгариф өлкәсендә урта яисә һөнәри белеме булган, белгечлеге буенча эшләүче салым түләүчеләргә, мәдәният һәм сәнгать хезмәткәрләренә, шулай ук мәгариф һәм фәнни-педагогик эшчәнлекне гамәлгә ашыручы фән һәм педагогика хезмәткәрләренә салым акчасын кайтаруны билгеләү хокукы бирергә тәкъдим ителә, тик салым түләүчеләрнең күрсәтелгән категорияләре 35 яшькә җитмәгән булырга тиеш», - диелгән проектка аңлатма язуында.

Документта шулай ук закон проекты салым салуда перспективалы «ике ачкыч» принцибын гамәлгә ашыра, ул вакытта федераль дәрәҗәдә ташламалар билгеләү мөмкинлеге һәм аның гомуми шартлары кертелә, ә Россия субъекты, финанс мөмкинлекләреннән һәм аны кертүгә ихтыяҗдан чыгып, ташламалар кертү турында карарны мөстәкыйль кабул итә, дип билгеләп үтелә.

«Бу чара ил күләмендә булмаса да, кызыксынган төбәкләрдә иң мөһим белгечләр җитмәү проблемаларын хәл итәргә ярдәм итәр дип өметләнәбез», - дип хәбәр итте Миронов Телеграм-каналында.

Авторлар фикеренчә, әлеге инициативаны кабул итү Россия Федерациясе субъектларына төп социаль өлкәләргә яшь белгечләрне җәлеп итү мөмкинлеге өчен нәтиҗәле салым инструменты бирәчәк.