Татарстан Дәүләт оркестры бинасын төзекләндерү өчен туфракны бер метрга күтәрәләр

Казанда «Марко (Набоков) йорты» мәдәни мирас объектын саклау буенча эшләр башкарылачак. Гоголь урамындагы 4-нче бинада хәзерге вакытта Татарстанның дәүләт академия симфоник оркестры урнашкан. Проект тарихи-мәдәни экспертизаның уңай нәтиҗәсен алды, дип хәбәр итә ТР Мәдәни мирас объектларын саклау комитеты.

«Г» хәрефе сыман формалы ике катлы объектны XX гасыр башында архитектор Константин Олешкевич төзегән. Бина беренче гильдия сәүдәгәре, Казанның күренекле сәүдәгәр эшлеклесе, Сәүдәгәрләр банкы идарә советы әгъзасы Мильтиад Марко гаиләсенеке булган. Соңыннан йорт аның улы Дмитрий Марконыкы (галим-химик, Нобель премиясе лауреаты Эмиль Фишер һәм профессор Андрей Альбицкийның укучысы) була, аннары Н. Набоковка сатыла, ә революциядән соң бинаны дәүләт милегенә алалар.

Проект буенча туфракны тарихи билгеләргә кадәр төшерү планлаштырыла. «Горводзеленхоз» сарайларын төзегәндә эчке ишегалды ягыннан туфракны бер метрдан артыгракка күтәргәннәр. Бу кадәр зур аерма булганлыктан, йортның подвал тәрәзәләре һәм тәрәзә алдында казылган чокырлары җир астында калган. Беренче катның янкормасы һәм стеналарының бер өлеше белән дә шул ук хәл. Бу конструкцияләрнең актив дымлануына китергән.

Гоголь урамы ягыннан йортның фасады буйлап җирне түбәнәйтү нәтиҗәсендә, бинага керү өчен төп ишекнең биеклеге артачак. Гомумән, подваллар, тәрәзә һәм ишек уемнары ачылачак.

Ишегалды фасадларын күп санлы буяулардан чистарталар, кирпеч өймәсен, бизәлешне торгызалар, ике катлы янкормадагы томаланган ишек һәм тәрәзә уемнарын ачалар. Шулай ук бинаның эчке почмагында балкон торгызыла һәм башка эшләр башкарыла, диелә хәбәрдә.