Әлфия Миңнуллина: Әти үзенең принципларына бервакытта да каршы килмәде

«Апуш» татар балалар театр студиясе шәкертләре Татарстанның атказанган матбугат һәм массакүләм коммуникацияләр хезмәткәре, Туфан Миңнуллинның кызы Әлфия Миңнуллина белән очрашты. Әлфия Миңнуллина балаларның «ул нинди әти иде» дигән соравына җавап бирде.

«Ул үз эшенә нык бирелгән кеше иде. Кечкенә вакыттан мин аны бик аз хәтерлим, чөнки әти гел йөреп торды, гел очрашуларда, командировкаларда булды. Мин шуны хәтерлим: әти чемоданын күтәреп чыгып китә иде, күтәреп кайтып керә, 1-2 төн куна иде дә, тагын чыгып китә иде. «Туфан абый шундый төрле холыкларны ничек уйлап чыгарды икән?» – дип сораганнары бар миннән. Миңа калса, ул аларны уйлап та чыгармагандыр, чөнки ул бик күп кеше белән очраша, сөйләшә, аралаша иде», – дип искә алды ул.

Әтисенең һәрвакыт бик кырыс һәм принципиаль кеше булуын ассызыклады. «Ул үзенең принципларына бервакытта да каршы килмәде. Турыдан-туры көрәшеп булмаган очракта дәшми кал, ләкин принцибыңнан баш тартма, дигән фикер белән яшәде һәм бу фикерне миңа, минем балаларга сеңдерергә тырышты. Менә минем холкым шундый: мин – елак. Бераз күңелне төшерә торган әйбер булса, мин елый башлыйм. Әти миңа гел: «Елама, көрәш!» – дип әйтә иде. Сезгә дә әйтәм: еламагыз, көрәшегез!» – диде ул балаларга.

Очрашудан репортажны, балаларның башка сорауларына җавапларны «Интертат» сайдында укырга була.

• Әлфия Миңнуллина «Апуш»лыларга: «Татарча фикерли торган кешеләр булып җитлексәгез иде»