Тәтештә Рөстәм Миңнеханов ярдәме белән ремонтланган мәктәп ачылды

Тәтештә капиталь ремонттан соң Россия Герое Андрей Андреевич Соколовский исемендәге 2нче мәктәп ачылды. Бу хакта Тәтеш муниципаль районы матбугат хезмәте хәбәр итә.

Капиталь ремонт барышында мәктәп бинасында инженерлык коммуникацияләре һәм тәрәзә блоклары алыштырылды, актлар һәм спорт заллары, ашханә, шулай ук медицина кабинеты яңартылды. Укучылар өчен иркен мәйданчык ясадылар һәм брусчатка җәйделәр. Яңа уку елында 2нче мәктәп парталары артына 375 укучы утырды, шуларның 28е — беренче сыйныф укучылары. Районда барлыгы 1899 бала укый.

Тәтеш районы башлыгы вазифасын башкаручы Евгений Курков сүзләренчә, Татарстан Рәисе Рөстәм Миңнеханов һәм Тәтеш районы башлыгы Рәмис Сафиуллов ярдәме белән укучылар яңа уку елын ремонтланган уңайлы мәгариф учреждениесендә башлый. Сәламәт, Россиягә тугры балаларны укыту һәм тәрбияләү өчен җаваплылык укытучыларга йөкләнә, алар балаларга әхлакый һәм патриотик тәрбия бирүдә мактаулы роль уйный, диде Курков.

Элек бу мәктәпне тәмамлаган махсус операциядә катнашучының исеме мәктәпкә 2023 елның 1 сентябрендә бирелгән иде. Андрей Соколовский хөрмәтенә мемориаль такта ачтылар, мәктәпнең Яшь армиячеләр отрядын да аның исеме белән атадылар.

«Район көчле педагогик составы — мавыгучан һәм белемле кешеләр белән горурлана. Ата-аналар белән Сез бөек Туган илебезнең лаеклы гражданнары һәм чын патриотлары булуга нигез саласыз. Безнең мәктәпне тәмамлаган Россия Федерациясе Герое Андрей Андреевич Соколовский да шундый иде, аның исеме мәктәп исемендә һәм безнең йөрәкләрдә мәңгеләштерелгән. Махсус хәрби операция гражданлык позициясен һәм патриотлыкны тикшерү булды», - диде Курков.