Рөстәм Миңнеханов: Татарстан Малайзиягә продукциянең иң киң спектрын җибәрергә әзер
Татарстан Рәисе Рөстәм Миңнеханов Малайзия Премьер-министры Әнвәр Ибраһим белән очрашты. Көнчыгыш икътисади форум кырларында алар хезмәттәшлекне киңәйтү перспективалары турында фикер алышты. Бу хакта ТР Рәисе матбугат хезмәте җитәкчесе Лилия Галимова хәбәр итте.
Очрашу башында Миңнеханов әңгәмәдәшкә 2024 елның августында Куала-Лумпурга сәфәр вакытында Татарстан делегациясен кабул иткән өчен рәхмәт белдерде.
«Сезне кабат күрүемә бик шатмын. Безнең соңгы очрашуыбыз бик дустанә атмосферада узды. Сез безне бирегә зур делегация белән килергә рухландырдыгыз», - диде Әнвәр Ибраһим.
Татарстан Рәисе искәрткәнчә, 2023 ел нәтиҗәләре буенча республика белән Малайзия арасында товар әйләнеше берьюлы 5,5 тапкырга арткан. Әмма аның күләме зур түгел — 61 млн доллар.
«Татарстан, куәтле сәнәгать потенциалы булган экспортка юнәлтелгән республика буларак, продукциянең иң киң спектрын китерергә әзер», - диде Рөстәм Миңнеханов.
Ул искәрткәнчә, «Көнчыгыш икътисади форум-2024»тә Россиянең зур компанияләре катнаша, алар илнең партнерлары була ала.
Малайзия премьеры Татарстан җитәкчесенә ике ил бизнесы арасында элемтәләр урнаштыруда актив катнашуы өчен рәхмәт белдерде.
Малайзия Премьер-министры Әнвәр Ибраһим форумның төп чит ил кунакларының берсе. Иртәгә ул Россия Федерациясе Президенты Владимир Путин белән Көнчыгыш икътисади форумның пленар утырышында катнаша.