Իտալիայի մշակույթի նախարարը եթերում խոստովանել է, որ սիրուհի ունի և ներողություն խնդրել վարչապետից ու կնոջից
Իտալիայի մշակույթի նախարար Ջեննարո Սանջուլիանոն, օրեր շարունակ շրջանառվող կասկածներից և մեղադրանքներից հետո, խոստովանել է, որ սիրուհի ունի:
Ինչպես գրում է euronews.com-ը, խոսքն ինֆլուենսեր Մարիա Ռոսարիա Բոչիայի մասին է, որը համագործակցել է Մշակույթի նախարարության հետ:
Նախարարն այս մասին ասել է Rai 1 հեռուստաալիքով հեռարձակված մոտ քսան րոպե տևած հարցազրույցում: Պաշտոնյան ներողություն է խնդրել վարչապետից, կառավարության անդամներից, իր համախոհներից ու կնոջից։
«Ես պատրաստ եմ հրաժարական տալ, երբ վարչապետ Ջորջիա Մելոնին ինձ խնդրի», - ասել է նախարարը:
Հարցազրույցի ընթացքում Սանջուլիանոն բացատրել է, որ Բոչիայի՝ որպես կարևոր իրադարձությունների գծով խորհրդական նշանակումը չեղյալ է հայտարարվել, քանի որ դա կարող էր խնդիրներ ստեղծել:
Նախարարը նաև ասել է, որ Բոչիայի ուղևորությունների բոլոր տոմսերը վճարվել են նրա անձնական հաշվի հետ կապված կրեդիտ քարտով:
«Ես երբեք պետական գումարներ չեմ ծախսել նրա համար, ես եմ վճարել ամեն ինչի համար, ինձ չեն կարող շանտաժի ենթարկել»,- ասել է նախարարը՝ հավելելով, որ վարչապետ Մելոնին չի ընդունել իր հրաժարականը: