Шри-Ланка Казандагы саммитта БРИКСка керү турында сорау җибәрәчәк

Шри-Ланка Казанда узачак саммитта БРИКСка керү мөмкинлеге турында рәсми сорау җибәрергә җыена. Бу турыда утрау дәүләте хөкүмәте вәкиле һәм тышкы эшләр министры Виджита Герат белдерде. ТАСС шул хакта яза.

«Без Шри-Ланканың БРИКСка керүенә гариза бирергә өметләнәбез, һәм күптән түгел Һиндстан тышкы эшләр министры [Субраманьям Джайшанкар] белән очрашу вакытында без әгъзалыгыбызны хуплауны сорадык», — дип китерә сәясәтче сүзләрен Шри-Ланканың Newsfirst яңалыклар порталы.

Моннан тыш, Герат сүзләренчә, Шри-Ланканың чарага чакырылган яңа Президенты Анура Кумара Диссанаяке «саммитта катнаша алмаячак», илне тышкы эшләр министры тәкъдим итәчәк (ягъни ул үзе - Т-и иск.).

«Татар-информ» хәбәр иткәнчә, Шри-Ланканың БРИКСка кушылу планын май аенда ук Тышкы эшләр министрлыгының ул вакыттагы башлыгы Али Сабри раслады.

БРИКСның уналтынчы саммиты Татарстан башкаласында 22-24 октябрьдә уза. Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. 30дан артык дәүләтнең лидеры саммитта катнашуларын раслады.