ՀՀ-ում արտոնյալ մարդ չկա, կլինի չարաշահում, կլինի գնահատական. Մկրտչյանը՝ ՊԵԿ-ի հրապարակման մասին
Կարդացեք ՊԵԿ-ի նյութը, ոչ թե միայն վերնագիրը: Այս մասին լրագրողների հետ զրույցում ասաց Աշխատանքի և սոցիալական հարցերի նախարար Նարեկ Մկրտչյանը՝ անդրադառնալով ՊԵԿ-ի հրապարակմանը, որը վերաբերում է իր ընտանիքին պատկանող ռեստորանում հայտնաբերված շուրջ 100 մլն դրամի ստվերային շրջանառությանը:
«Ես տեղյակ չեմ, այն ինչ գրված է, գրված է: Ես առհասարակ չեմ խառնվում այդ գործերին, ընդհանրապես կապ չունեմ այդ բիզնեսի հետ, այդ բիզնեսով զբաղվում է իմ հորեղբայրը, ով դրանով զբաղվում է դեռ 2000-ականներից:
Եթե չեմ սխալվում, ինչ-որ համադրումների խնդիր է եղել, որը վերականգնվել է: Բայց դա իմ խնդիրը չէ, իմ ընտանիքը շատ ավելի մեծ է, հետևաբար յուրաքանչյուր մարդ իր գործունեության համար է պատասխան տալիս: ՀՀ-ում չկա արտոնյալ մարդ, բոլորն օրենքի առաջ հավասար են, կլինի չարաշահում, կլինի նաև համապատասխան գնահատական»,- ասաց նախարարը: