Эльмира Зарипова: Казанда хезмәт базарында сәнәгать өлкәсе алдынгы урында

Казанда хезмәт базарында сәнәгать өлкәсе алдынгы урында. Әлеге секторга барлык вакансияләрнең 24 проценты туры килә, дип белдерде Казан шәһәр Думасы сессиясендә республиканың хезмәт, мәшгульлек һәм социаль яклау министры Эльмира Зарипова.

Ул билгеләп үткәнчә, вакансияләрнең тагын дүрт проценты транспорт һәм логистикага, өч проценты сәүдә, ике проценты фән һәм мәгариф өлкәсенә туры килә.

Спикер шулай ук ТР башкаласында уртача хезмәт хакы 88,6 мең сум тәшкил итә, дип ассызыклады. Бу республика (70,8 мең) һәм Идел буе федераль округы (63 мең сум) буенча уртача хезмәт хакына караганда күбрәк.

Иң кирәкле һөнәрләр – слесарьләр (718 вакансия, бу өлкәдә белгечләрнең уртача хезмәт хакы 51 мең сум), монтажчылар (647 вакансия, 60,5 мең сум), инженерлар (646 вакансия, 55,2 мең сум) һәм машина йөртүчеләр (452 вакансия, 78,6 мең сум).