Равил Әхмәтшин «Ватан Геройлары истәлегенә» медале белән бүләкләнде

Россия Саклану министры урынбасары Юныс-Бәк Евкуров Татарстан Премьер-министры урынбасары — Татарстанның Россиядәге Тулы вәкаләтле вәкиле Равил Әхмәтшинга «Ватан Геройлары истәлегенә» ведомство медален тапшырды. Бу хакта Тулы вәкаләтле вәкиллек матбугат хезмәте хәбәр итә.

Бүләкләү тантанасы Россия оборона илкүләм үзәгендә «Армия һәм җәмгыять. Дәүләт оборонасын ныгыту мәнфәгатьләрендә ведомствоара хезмәттәшлек» Х ведомствоара конференциянең пленар утырышында булды. Катнашучылар арасында Чаллы мэры Наил Мәһдиев тә бар иде.

Равил Әхмәтшин Россия Кораллы көчләренә йөкләнгән бурычларны хәл итүдә ярдәм иткән өчен медаль белән бүләкләнде. Тулы вәкаләтле вәкиллек матбугат хезмәтендә ул «илдә беренчеләрдән булып махсус хәрби операциядә катнашучыларга ярдәм акцияләре үткәрә башлады» дип искәрттеләр.

Татарстанның Россиядәге Тулы вәкаләтле вәкиле Россия хәрби хезмәткәрләре урнашкан урыннарда 30 тапкыр булган. Алар белән һәр очрашуда ул беренчел кирәк-ярак әйберләр, махсус техника, автомобильләр һәм «тарафдарлары ярдәме», шул исәптән Наил Мәһдиев ярдәме белән җыелган һәм сатып алынган башка кирәкле әйберләрне тапшырган.

Йөк партияләре Россия Саклану министрлыгы белән килешү буенча формалаштырыла. Аерым алганда, «Төньяк» группировкасы командованиесе белән килештерелә. Чираттагы ярдәм партиясе хәрбиләргә якын көннәрдә китерелергә тиеш, дип ачыклык керттеләр Татарстанның Россиядәге Тулы вәкаләтле вәкиллегендә.