Sjukefråværet framleis på nivå med svineinfluensaen

Sjukefråværet var 7,19 prosent i tredje kvartal, viser tal frå SSB.

Det er ein auke på 1,6 prosent samanlikna med kvartalet før, som var rekordhøgt.

Fråværet er med det framleis det høgaste sidan svineinfluensaen for 15 år sidan.

Det er over 10 millionar tapte dagsverk i dette kvartalet, på grunn av sjukefråværet, ifølge Nav.

Tredje kvartal, som omfattar juli til september, er vanlegvis kvartalet med det lågaste sjukefråværet.

– Den gode nyheita er at stigninga flatar ut. Men det må framleis bli sagt at det er på eit høgt nivå, seier Nav-direktør Hans Christian Holthe til NRK.

Det er særleg luftvegsjukdommar og mange langtidssjukemelde som er grunnen til at fråværet aukar. Holthe seier dei held eit spesielt auge med langtidsfråværet.

– Der har vi ein stor del som har sjukmelding på grunn av psykisk vanhelse. Dei gjer ofte at folk er lenge vekke frå arbeidet. Terskelen blir høgare med langtidsfråvær.

Arbeids- og inkluderingsminister Tonje Brenna (Ap) seier til NTB at det er viktig å få det høge sjukefråværet ned.

– Vi treng alle vi kan i arbeid i Noreg. Vi har ikkje råd til at fråværet held fram med dette over tid.