Казанда һава торышы турында метеоролог: Декабрь тотрыксыз булуы белән аерылып тора

Декабрьнең беренче декадасы Казанда нормадан шактый җылырак булды. Төньяк Атлантиканың активлыгы арту сәбәпле, температура һәм атмосфера басымы еш үзгәреп торды. Бу хакта «Татар-информ»га профессор, география фәннәре докторы Юрий Переведенцев хәбәр итте.

«Декабрь һәрвакыт һава торышының тотрыксыз булуы белән аерылып тора. Казан федераль университеты метеорология обсерваториясе мәгълүматлары буенча, беренче декада климатик нормадан 3,5 градуска җылырак булды. Норма буенча һава температурасы -5,9 градус булырга тиеш иде, ә ул -2,4 градус иде. Кар соңга калып яуды, хәзер Казанда кар катламының биеклеге якынча 14 см чама тәшкил итә», - дип сөйләде ул.

Юрий Переведенцев мәгълүматлары буенча температураның еш үзгәрүе тискәре нәтиҗәләргә китерә. «Кан басымы сикерә, бер тәүлек эчендә ул 10 мм га төште, моны метеобәйле кешеләр сизде», - дип аңлатты ул.

«Татар-информ» әңгәмәдәше Россиянең Европа территориясендә атмосферада «зур контрастлар» күзәтелә, дип өстәде.

«Хәзер циклон безгә Атлантикадан килә, ә көньякта циклон Урта диңгездән килә. Атмосфера фронтлары, һава температурасы һәм атмосфера басымы, җил, буран, бозлавык күзәтелә», - диде Переведенцев.