Мәскәүдә «Акыл фабрикасы» мәктәбе узачак
21 декабрьдә Мәскәүнең Татар мәдәнияте үзәгендә Бөтендөнья татар конгрессы, Мәскәү татарлары автономиясе һәм Татарстанның тулы вәкаләтле вәкиллеге каршындагы Яшьләр Советы ярдәмендә, Бөтендөнья татар яшьләре форумы «Акыл фабрикасы» белем бирү-гамәли мәктәбен үткәрәчәк. Бу хакта Мәскәү татарлары автономиясе хәбәр итә.
«Акыл фабрикасы» – яңа белемнәр алуга һәм үзеңнең уникаль проектыңны булдыруга юнәлдерелгән проект. Программага лекторий, дискуссия, мастер-класслар һәм ворк-шоп керә. Бу Мәскәүнең актив яшьләре белән танышу, борчыган мәсьәләләр турында фикер алышу һәм тәҗрибә уртаклашу өчен уникаль мөмкинлек булачак.
Белем бирү программасы белән беррәттән, мини-күргәзмә һәм татар дизайнерлары эшләрен сату да планлаштырыла.
Программа ахырында татарча стендап була, монда һәркем катнашырга гариза бирә һәм үзен стендапер буларак сынап карый ала.