12 елда Татарстанда күпбалалы гаиләләр саны 2,3 тапкырга арткан

Өйләнешүчеләр саны арта, аерылышулар кими – Татарстанда Гаилә елының төп йомгагы әнә шундый. Статистика буенча, гаиләләр 10-15 елдан соң ешрак таркала һәм бу хакта җитди уйланырга кирәк. Бу хакта бүген узган брифингта Татарстан Премьер-министры урынбасары Ләйлә Фазлыева әйтте.

Быелның 11 ае өчен статистика мәгълүматларын Татарстан Министрлар Кабинетының ЗАГС Идарәсе җитәкчесе Эльвира Әхмәтова сөйләде.

«Гаилә елында 22 меңнән артык пар гаилә корган. Соңгы биш елда Татарстан мең кешегә теркәлгән гаиләләр саны буенча Идел буе федераль округында лидер булып тора», – диде ул.

Ир-атларның гаилә кора башлау яше – 25-29, ә кызларныкы – 18-24 яшьне тәшкил итә. Быел өйләнешү өчен гаризаларның 70 проценты Госуслуги дәүләт порталында бирелгән. Шул ук вакытта аерылышулар саны узган елның шул ук чоры белән чагыштырганда 7,4 процентка кимегән. 11 айда барлыгы 12 мең аерылышу теркәлгән. Быел гаилә корган яшь парларның 0,6 проценты аерылышкан.

«Соңгы ике елда статистика шундый: 10-19 ел элек өйләнешкән парлар ешрак аерылыша. Әгәр яшь диапазонын алсак, хатын-кызларның күпчелеге 40-49 яшьтә аерылыша», – диде Эльвира Әхмәтова.

Ул кешеләрнең ни өчен урта яшьтә мондый карар кабул итүләре турында уйланырга чакырды.

«Безгә яшь парлар белән генә түгел, ә шушы яшь категориясе белән дә шөгыльләнергә кирәк. Психологлар һәм иҗтимагый оешмалар белән комплекслы эш булырга тиеш», – дип саный спикер.

Ләйлә Фазлыева фикеренчә, саннарга игътибарлы булырга кирәк. Чөнки узган елларда гаилә корган парлар да аерылырга мөмкин.

«Гаилә тормышы өчен 10-15 ел мөһим, әһәмиятле этапка әйләнә, гаилә таркалмасын өчен дуслар, якыннар ярдәме дә кирәк булырга мөмкин», – диде Фазлыева.

Ахырда ул позитив яңалык та җиткерде. Соңгы 12 елда Татарстанда күпбалалы гаиләләр саны 24,4 меңнән 55,7 меңгә, ягъни 2,3 тапкырга арткан. Республикада гаиләләрдә дүртенче һәм аннан соңгы балалар туу да арта.