Азнакайның Балалар иҗаты үзәгендә яшь армиячеләр балы узды

Азнакайның Балалар иҗаты үзәгендә яшь армиячеләр балы узды. Анда купшы бал күлмәкләре кигән кызлар, ыспай хәрби киемнәрдәге егетләр катнашты. Бу хакта «Азнакай» сайтында Нәсимә Фазлыева хәбәр итә.

Әлеге чарада катнашучыларны район хәрби комиссары Руфат Гайнетдинов, район мәгариф идарәсе җитәкчесе урынбасары Зөлфия Зарипова, «Яшь армиячеләр» хәрәкәтенең җирле бүлеге штабы җитәкчесе Ринат Җиһаншин сәламләде, яшь армиячеләргә укуларында, тормышларында уңышлар, бәйрәмнәренең күңелле узуын теләде.

Бер төркем укучыларның тантаналы рәвештә ант итеп, «Яшь армиячеләр» сафына кабул ителде.

Менә бәйрәмнең иң күңелле мизгелләре җитте. Кыш бабай һәм Кар кызы килде. Алар укучылар белән биеделәр дә, төрле уеннарда да катнаштылар. Яшь армиячеләр төрле бал биюләрен башкарып, үзләренең сәнгатьтә дә осталыкларын күрсәтте. Һәммәсе дә үзен элеккеге тарихи чорларга, традицияләргә кайткан кебек хис итте. Бу көнне яшь армиячеләр махсус хәрби операциядәгеләргә «Солдат хатларын» да юллады.

Фото: © https://aznakaevo-rt.ru/