Gjerdrum-sikta anka varetektsfengsling – har snudd

Romerikes Blad skriv at påtalemakta har fått medhald i å forlenge varetektsfengslinga av Gjerdrum-sikta i fire veker til. Ifølgje avisa anka mannen på staden.

Fredag ettermiddag opplyser forsvarar av sikta, Hilde Mo, at han trekk anka.

Sikta har vore i varetekt sidan 13. desember.

Påtalemakta grunngav vidare fengsling med at det vil støyte allmenta sin rettskjensle dersom sikta går fri.

– Det vil støyte allmenta og kunne skape utryggleik i samfunnet når rettsvesenet slepp laus ein person som er sikta for slikt alvorleg forhold, seier politiadvokat Eirik Braathen til NRK.

Ifølgje sikta sin forsvarar, ynskja mannen i utgangspunktet å bli lauslaten, fordi han har det vanskeleg i fengselet.

Mannen er sikta for å ha drepe Anette Prydz Sjursen (34) og dottera May Elin (3), 12. desember i fjor.