Նոր Հռոմի պապը խաղաղության ուղերձ է հղել
Իտալերենով հնչեցրած իր առաջին խոսքում նորանշանակ Հռոմի պապ Լևոն XIV-ը հայտարարել է, որ ցանկանում է, որպեսզի խաղաղության այս ուղերձը «մտնի մարդկանց սրտերը, հասնի նրանց ընտանիքներին և բոլորին՝ անկախ գտնվելու վայրից»։
Նա հարգանքի տուրք է մատուցել իր նախորդին՝ Պապ Ֆրանցիսկոսին, և հավատացյալներին կոչ է արել «շարունակել առաջ ընթանալ՝ առանց վախի, միասնաբար՝ Աստծո և միմյանց հետ ձեռքեր տված»։
Լևոն XIV-ը նաև շնորհակալություն է հայտնել կարդինալներին՝ իրեն այս պատասխանատու առաքելության համար ընտրելու կապակցությամբ։ Նորընտիր պապը հայտնվել է Վատիկանի Սուրբ Պետրոսի տաճարի պատշգամբում՝ դիմելով բազմահազարանոց հավատացյալներին։
Չնայած Վատիկանի՝ ԱՄՆ-ից պապ ունենալու վերաբերյալ երկարամյա վերապահումներին՝ պայմանավորված այդ երկրի գերտերություն լինելու և աշխարհիկ գլոբալ ազդեցությամբ, Չիկագոյում ծնված Ռոբերտ Պրևոստն այսօր ընտրվել է Հռոմի պապ՝ ստանալով Լևոն XIV անունը։
The post Նոր Հռոմի պապը խաղաղության ուղերձ է հղել first appeared on MediaLab Newsroom-Laboratory.