Minst 14 drepne i angrep mot flyktningleir i Darfur

Minst 14 menneske vart drepne sundag då Sudans paramilitære styrkar, Rapid Support Forces (RSF), gjekk til angrep på Abu Shouk-leiren for internt fordrivne i Nord-Darfur.

Det melder Reuters.

Ifølgje lokale hjelpearbeidarar råka angrepet både marknaden, moskéar og bustader inne i leiren.

Sudan står midt i ei av dei største humanitære krisene i verda. Ifølgje FN er over 12,3 millionar menneske drivne på flukt sidan krigen braut ut i april 2023, meir enn 8,8 millionar er internt fordrivne i Sudan, medan over 3,5 millionar har flykta til nabolanda.

FN åtvarar om hungersnaud i delar av Darfur, og over 30 millionar menneske – meir enn halvparten av befolkninga – vil trenge humanitær hjelp i 2025.

Ifølgje FN er situasjonen særleg alvorleg for barn og kvinner, som utgjer fleirtalet av dei råka.