Миңнеханов 2036 елга кадәр Россия үсеше буенча стратегик киңәшмәдә катнашты
Татарстан Рәисе Рөстәм Миңнеханов 6 июньдә видеоэлемтә буенча стратегик үсеш һәм милли проектлар советы утырышында катнашты. Очрашу Россия Президенты Владимир Путин рәислегендә оештырылды. Бу хакта ТР Рәисе матбугат хезмәте хәбәр итә.
Утырышның төп темасы 2030 елга кадәр һәм перспектива белән 2036 елга кадәр үсешнең милли максатларына ирешүгә юнәлдерелгән яңа инициативаларны башлап җибәрү булды.
Владимир Путин хәбәр иткәнчә, илебез конструкторлары пилотсыз системаларны эшләүдә сизелерлек алга китте. Ул билгеләп үткәнчә, кайбер юнәлешләрдә Россия БПЛАлары дөньяда иң алдынгылардан санала, һәм алар инде чит илләрдә копияләнә.
Төп доклад белән РФ Хөкүмәте рәисе Михаил Мишустин чыгыш ясады. Шулай ук космосны һәм биоикътисадны үзләштерү өлкәсендә технологик лидерлык, шулай ук «Пилотсыз авиация системалары» милли проектын гамәлгә ашыру барышы турында докладлар планлаштырылган иде.