Роналдунинг ўғли илк бор Португалия U-16 жамоасига чақирилди

Криштиану Роналдунинг ўғли — Криштиану Жуниор илк бор Португалиянинг 16 ёшгача бўлган миллий терма жамоаси сафидан ўрин олди. У ҳозирда отаси каби Саудия Арабистонининг «Ан Наср» клуби тизимида тўп сурмоқда.

15 ёшли ёш иқтидор Анталияда бўлиб ўтадиган Федерациялар кубогида майдонга тушиши кутилмоқда. Португалия U-16 жамоаси мазкур мусобақада Туркия, Англия ва Уэльс терма жамоаларига қарши ўйин ўтказади.

Аввалроқ Роналду Жуниор Португалиянинг U-15 жамоасига чақирилган ва май ойида Хорватияга қарши ўртоқлик учрашувида дебют голини киритган эди. Бу натижа ёш футболчининг ривожланиши ва келажакда отаси изидан бориш эҳтимолини янада кучайтирмоқда.