Россия Ойда электр станцияси қуришни режалаштирмоқда
Россия яқин ўн йил ичида Ойда электр станцияси қуришни режалаштирмоқда. Бу иншоот Россиянинг Ой дастури ҳамда Россия ва Хитой ҳамкорлигидаги илмий тадқиқот марказини электр энергияси билан таъминлаши кўзда тутилган. Россия бу лойиҳа орқали Ойда узоқ муддатли илмий фаолият олиб боришни мақсад қилган.
Россия давлат космик агентлиги Роскосмос маълумотига кўра, электр станцияси 2036-йилгача барпо этилиши режалаштирилган. Лойиҳа доирасида Ойда ҳаракатланувчи техника, илмий кузатув қурилмалари ва тадқиқот инфратузилмаси ишлаши учун барқарор энергия манбаи яратилади.
Расмий баёнотларда станция тури аниқ кўрсатилмаган бўлса-да, лойиҳага Россиянинг ядро соҳасидаги йирик ташкилотлари жалб этилгани сабабли у атом энергияси асосида бўлиши кутилмоқда. Роскосмос раҳбари Дмитрий Баканов Ойда атом электр станцияси қуриш Россиянинг муҳим мақсадларидан бири эканини илгари айтган.
Мутахассислар ушбу лойиҳа Россиянинг космик соҳадаги мавқеини мустаҳкамлашга қаратилганини таъкидлашмоқда. Сўнгги йилларда АҚШ ва Хитой Ой тадқиқотларида фаол бўлиб келмоқда. Ойда доимий энергия манбаси яратилиши эса Россияга бир марталик парвозлардан узоқ муддатли тадқиқотларга ўтиш имконини бериши мумкин.