Саида Мирзиёева президентнинг босиб ўтган йўлини айтди
Президент Администрацияси раҳбари Саида Мирзиёеванинг “Alter Ego” лойиҳасига берган кенг қамровли интервьюсидан янги тафсилотлар очиқланди. Кирилл Алтман билан суҳбатда у Шавкат Мирзиёев давлат бошқарувида таянадиган тамойиллар, иш услуби, шунингдек, касбий фаолият ва оилавий тарбия билан боғлиқ шахсий жиҳатлар ҳақида тўхталди. Бу ҳақда upl.uz хабар беради.
Интервьюнинг асосий йўналиши ислоҳотларни амалга ошириш стратегияси бўлди. Саида Мирзиёевага кўра, катта натижага фақат босим ёки кескинлик билан эришиб бўлмайди: сўнгги тўққиз йил ичида мамлакатдаги кенг кўламли ўзгаришлар сиёсий йўналишдаги мослашувчанлик ва раҳбариятнинг оқилона қарорлари ҳисобига самара берган.
Администрация раҳбари президентнинг кам учрайдиган жиҳатини алоҳида таъкидлади: у сабр билан тўғри паллани кутишни билади, бироқ ижро интизоми ва сифат талабини пасайтирмайди. Саида Мирзиёева буни Шавкат Мирзиёевнинг давлат тизимини барча поғоналари билан ичидан билиши, яъни туман ҳокимидан Вазирлар Маҳкамаси раҳбаригача бўлган йўлни босиб ўтгани билан изоҳлади.
Оилавий тарбия мавзусида эса президент фарзандлари отасининг иш ҳаётидан четда бўлмагани қайд этилди. Саида Мирзиёева болалик хотираларини эслаб, ўзи ва синглиси отаси билан Мирзо Улуғбек туманидаги ҳамда Жиззах вилоятидаги хизмат сафарларига бирга борганини айтди.
Унинг фикрича, инсонни шакллантириш фақат нуфузли мактаб ёки устозлар билан эмас, аввало ота-онанинг шахсий намунаси билан боғлиқ. Саида Мирзиёева ўз камолотида отасининг ҳаётий позицияси ва меҳнатсеварлиги ҳал қилувчи рол ўйнаганини таъкидлади.
Президентнинг тинмас энергияси ҳақида гап кетганда, Саида Мирзиёева бу савол яқин атрофдагиларни ҳам ўйлантиришини яширмади. Унинг айтишича, жамоа чарчаган паллаларда ҳам Шавкат Мирзиёев ишлашда давом этади ва буни фақат Ватанга муҳаббат билан изоҳлайди.
Администрация раҳбари бундай ишчанликни маълум маънода “метафизик” ҳолат сифатида баҳолаб, тақдир ва ҳар бир инсонга бериладиган иқтидор ҳақида ҳам мулоҳаза юритди. У ҳаётий вазифаларнинг бажарилиши руҳий ҳолатга ҳам таъсир қилишини KPI (самарадорликнинг асосий кўрсаткичлари) билан қиёслаб тушунтирди.
Саида Мирзиёева 2026 йил январьида ўзини ўн йил аввалги давр билан солиштириб, ички ўзгариш катта бўлганини айтди. Унинг таъкидлашича, энг муҳим ютуғи — шошқалоқликдан вазминлик ва бағрикенгликка ўтгани, масъулият ортган сари жараёнларга кенгроқ миқёсда қарай бошлаганидир.
Шу билан бирга, у ҳокимиятни ҳокимият учун истамаслигини алоҳида қайд этди. Саида Мирзиёеванинг айтишича, унинг асосий мақсади — отасининг орзулари рўёбига кўмаклашиш, бу орзулар эса Ўзбекистон халқининг фаровонлиги билан чамбарчас боғлиқ.
Шахсий фазилатлар ҳақида сўз борганда, Администрация раҳбари ўзини болалигидан етакчиликка интилган инсон сифатида таърифлади. У оилада фикри доим ҳурмат қилинганини, ота-онаси муносабатларини эса отадаги қатъийлик ва онадаги кучли харизма уйғунлашган “идеал мувозанат” деб атади.
Профессионал томонлама Саида Мирзиёева кучли жиҳат сифатида самарали жамоа туза олиш ва кадр танлашда сезги (интуиция)га таянишини кўрсатди. Заиф нуқтаси эса ўзига нисбатан ўзгача юқори талабчанлик бўлиб, бу доимий ички назорат ва кескин ўзини чеклашга олиб келишини таъкидлади.
Суҳбат якунида “сарой интригалари” мавзуси ҳам кўтарилди. Саида Мирзиёева бундай ҳолатларни ҳар қандай ҳокимият марказида учрайдиган табиий жараён сифатида баҳолаб, бу муҳитда ишлаш учун қатъият ва маъмурий донолик кераклигини айтди.
Интервьюда Саида Мирзиёева ишлайдиган Президент Администрацияси биноси ҳам эслатиб ўтилди. У Тошкентнинг тарихий марказида жойлашган бўлиб, халқ орасида “Оқсарой” номи билан танилган; “оқ сарой” атамаси эса Амир Темур давридан бери ният поклиги ва адолат рамзи сифатида тилга олинади.