Испанияда икки тезюрар поезд тўқнашуви оқибатида 21 киши ҳалок бўлди
Испаниянинг Кордова провинциясида 18 январ куни икки тезюрар поезд тўқнашиб кетиши оқибатида камида 21 киши ҳалок бўлди. Бу ҳақда kursiv.uz хабар беради.
Маълумотларга кўра, Малага шаҳридан Мадридга йўл олган Iryo компаниясига тегишли поезд релсдан чиқиб, Испания пойтахтидан Уелвага кетаётган бошқа темирйўл таркиби билан урилган. Зарба ортидан иккинчи поезд йўл четидаги қияликдан пастга сирғалиб тушган.
Андалусия минтақавий ҳукумат раҳбари Хуанма Морено 75 нафар жабрланувчи шифохонага ётқизилганини, улардан 15 нафари оғир аҳволда эканини билдирди. У қурбонлар сони ортиши мумкинлигини ҳам айтиб, ҳалок бўлганлар жасадларини чиқариш учун оғир техника зарурлигини таъкидлади.
El Pais нашрининг ёзишича, воқеа жойига яқин вақт ичида испан ҳарбийлари ҳам етиб боради. Испания транспорт вазири Оскар Пуэнте эса авария содир бўлган темирйўл қисми ўтган йил баҳорида таъмирлангани ва техник ҳолати яхши бўлганини айтиб, ҳодисани «ниҳоятда ғалати» деб атади.