Машҳур тиктокчи Хаби Лейм ўз “юзи”ни 975 млн АҚШ долларига сотди

TikTok’да сукут билан дунёни “овора” қилган Хаби Лейм навбатдаги сенсацияли қадамни ташлади. Охирги кунларда тарқаган маълумотларга кўра, у билан боғлиқ асосий тижорат компанияси — «Степ Дистинктив Лимитед»ни «Рич Спаркл Холдингс» (АНПА) сотиб олиш бўйича келишувга келган. Битим қиймати 975 миллион АҚШ долларигача баҳоланмоқда ва энг муҳими — бу оддий “реклама шартномаси” эмас, тўлиқ бизнесни қўлга киритиш форматида кўринаяпти.

Келишувнинг асосий моҳияти шундаки, кейинги 36 ой давомида «Рич Спаркл Холдингс» Хаби Лейм брендини тижоратлаштириш бўйича глобал эксклюзив ҳуқуқларга эга бўлади: реклама, маҳсулотлар, ҳамкорлик лойиҳалари, контентдан даромад қилиш каналлари — ҳаммаси бир экотизимга йиғилади. Яъни, Хабининг даромади алоҳида-алоҳида реклама роликларига эмас, балки унинг атрофида қурилаётган катта бизнес машинанинг умумий натижасига боғланади.

Энг қизиғи — битим “нақд пул бериб юборилди” деган оддий сценарийга ўхшамайди. Расмий ҳужжатларда келишув акциялар чиқариш орқали, яъни улуш бериш шаклида амалга оширилиши қайд этилган. Шунинг учун “у энди ҳеч нарса қилмаса ҳам ойига 27 миллион доллар аниқ келади” деган гаплар эҳтиёткорлик билан қабул қилиниши керак: қиймат — баҳолаш, даромад эса бизнеснинг кейинги натижасига боғлиқ.

Битимнинг яна бир шов-шувли нуқтаси — сунъий интеллект масаласи. Манбаларда Хаби Лейм образи асосида “рақамли эгизак” йўналиши ҳам тилга олинади: юзи, овози ва ҳаракат услубига яқин AI-контент ишлаб чиқиш орқали турли тилларда доимий эфирлар ва тижорат лойиҳаларини кенгайтириш режаси бор. Бу “24/7 ишлайдиган Хаби” деган концепт — ва бу бозорда ҳали кўпчилик ўрганиб улгурмаган янги ўйин қоидалари.

Хулоса оддий: Хаби Лейм бу гал ҳам трендни ушлаб қолмади — тренднинг ўзини яратяпти. Бугун контент — шунчаки видеолар эмас, катта капитал, улкан ҳуқуқлар ва узоқ муддатли бизнес стратегиясига айланяпти. Энди эса мухлисларга қоладиган савол битта: “сукут” қанча давом этса ҳам, у барибир пул ишлатишда гапириб қўйяпти.