BTS гуруҳи Мексикани ларзага солди: чипталар тугаб қолиши ва рекорд талаб
Тўрт йиллик танаффусдан сўнг BTS саҳнага қайтиши фонида гуруҳнинг дунё бўйлаб турига қизиқиш кескин ошди. Айниқса, Мексикадаги концертларга талаб ниҳоятда юқори бўлаётгани айтилмоқда. Шу сабабли Мексика президенти Клаудия Шейнбаум Жанубий Корея президенти номига мурожаат йўллаб, Мексикада қўшимча концертлар ташкил этиш масаласини кўриб чиқишни сўраган.
Шейнбаумнинг таъкидлашича, у Корея президентига хат ёзган, бироқ ҳозирча жавоб келмаган. Шунга қарамай, Мексика томони ижобий ечим бўлишига умид қилмоқда. Режага кўра, BTS май ойида Мехико шаҳрида учта концерт бериши белгиланган.
Маҳаллий ОАВ хабарига кўра, ушбу концертлар учун чипталар 40 дақиқадан ҳам кам вақт ичида тўлиқ сотилиб кетган. Тахминан 1 миллион мухлис 150 минг дона чипта учун рақобат қилгани айтилади. Расмий платформада чипталар нархи 100 доллардан 1 030 долларгача бўлган бўлса, қайта сотув майдонларида нархлар 5 300 доллардан ҳам юқорига кўтарилгани қайд этилмоқда.