Казанда 27 февральдә Рамазан аена багышланган хәйрия автобусы йөриячәк

Изге Рамазан аеның беренче җомга көнендә, 27 февральдә, Казанда 30нчы маршрут буйлап бушлай автобус йөриячәк. Инициативаны Татарстан Республикасы мөселманнары Диния нәзарәте ярдәме белән «Зәкят» хәйрия фонды гамәлгә ашыра.

Транспортның алгы пыяласына «Зәкят» фондыннан хәйрия маршруты» дигән язу урнаштырылачак, ә салон шарлар белән бизәләчәк.

Акция 2023 елдан бирле үткәрелә. Аның максаты – хәйриячелекне популярлаштыру, Рамазан аеның әһәмияте һәм игелекле гамәлләр кылуның мөһимлеге турында сөйләү.

Быел «Рамазан – игелекле гамәлләр ае» хәйрия марафоны кысаларында борт номеры 708 булган автобус 6:00 сәгатьтән 18:00 сәгатькә кадәр бушлай йөриячәк. 30нчы маршрут Азинодагы «Дуслык» һәм Юдино бистәсендәге «Вокзал яны» тукталышлары арасында йөри, Совет, Идел буе, Вахитов һәм Киров районнары аша уза.

Маршрут очраклы рәвештә сайланмаган: бу иң күп пассажирлар йөрүче маршрутларның берсе. Моннан тыш, бу маршрутта йөрүче пассажирлар арасында ярдәмгә мохтаҗ кешеләр күп. Алар Рамазан аеның әһәмияте һәм Татарстандагы хәйрия марафоны турында белә алачак. Автобуста QR-код аша мохтаҗларга һәм авыру балаларга акчалата ярдәм җибәрергә мөмкин булачак. Быел фонд 100 авыру кешегә ярдәм күрсәтергә планлаштыра.