Дәүләт Советы торакны файдалануга тапшыру, ипотека, ятимнәр өчен чаралар турында сөйләште
ТР Дәүләт Советының Торак сәясәте һәм инфраструктура үсеше комитетының күчмә утырышы республиканың Төзелеш министрлыгында узды. Депутатлар экспертлар белән берлектә торак төзелеше һәм ятим балаларны торак белән тәэмин итү мәсьәләләрен карадылар, шулай ук профильле законга үзгәрешләр турында фикер алыштылар, дип хәбәр итә ТР Дәүләт Советы матбугат хезмәте. Утырышны торак сәясәте һәм инфраструктура үсеше комитеты рәисе Андрей Егоров үткәрде.
ТР төзелеш министры урынбасары Илшат Гыймаев билгеләп үткәнчә, Татарстан торакны файдалануга тапшыру буенча лидерлар рәтенә керә. 2025 елда 3,515 млн кв.м тапшырылган — республика тарихында рекордлы күрсәткеч. Бу күрсәткеч буенча төбәк Идел буе федераль округында беренче һәм Россиядә бишенче урында тора. 110 инвестицион күп фатирлы йорт (952 мең кв.м), социаль ипотека буенча 44 йорт (162 мең кв. м) һәм якынча 17,8 мең шәхси йорт (2,4 млн кв. м) файдалануга тапшырылган. Торак белән тәэмин ителеш бер кешегә уртача 31 кв.м тәшкил иткән.
2026 елда кимендә 3,175 млн кв.м торак файдалануга тапшыру планлаштырыла, бүгенгә планның 35,8 проценты үтәлгән. Ятим балалар өчен быел 641 фатир алачаклар һәм 51 йорт төзиячәкләр.
Гыймаев шулай ук алданган өлешчеләр проблемасының хәл ителүе турында хәбәр итте: 2007 елдан 2023 елга кадәр 146 проблемалы йорт файдалануга тапшырылган, 18,6 мең кешенең хокуклары торгызылган. Татарстанның проблемалы объектлары реестрында хәзер андыйлар юк.
Проблемалар арасында – түбән ихтыяҗ аркасында йортларны тапшыру тоткарлануы, шулай да 2025 елның икенче яртысында сатулар 31 процентка арткан. Үзәк Банк мәгълүматлары буенча, ипотекалар саны, тулаем алганда, 29,2 процентка кимегән, әмма өлешләп төзүдә катнашу буенча — 9,2 процентка арткан. 2026 ел башында, гаилә ипотекасында үзгәрешләр көтелү фонында, килешүләр саны 213,7 процентка, өлешләп төзүдә катнашу буенча — 323,5 процентка арткан.
Депутатлар ресурслар белән тәэмин итүче оешмаларның куәтләре белән дә кызыксынган. 2030 елга кадәр Казан, Чаллы һәм Әлмәт агломерацияләрендә инфраструктураны үстерү планнары эшләнгән, әмма Лаеш һәм Питрәч районнарында кыенлыклар бар. Казанның сәнәгать зоналарында торак өчен 4 млн кв. метрдан артык мәйдан бүлеп бирелгән.