Խորթ մոր կողմից ծեծի ենթարկված 1, 2 տարեկան երեխան մահացել է. բժշկական կենտրոն
Խորթ մոր կողմից ծեծի ենթարկված 1, 2 տարեկան երեխան, որը մի քանի օր առաջ էր հոսպիտալացվել և ծանր վիճակում էր, մահացել է։
«Արմենպրես»-ին այս մասին հայտնում են «Արաբկիր» բժշկական կենտրոնից։
«Խոր ցավով տեղեկացնում ենք, որ մեկ տարեկան երկու ամսական փոքրիկի կյանքը փրկել չի հաջողվել։ Նա մարտի 16-ին «կլինիկական մահ» ախտորոշմամբ ընդունվել էր «Արաբկիր» բժշկական համալիր։ Բժիշկներին այդ պահին հաջողվել էր վերականգնել երեխայի կենսական ֆունկցիաները։ Վերջին օրերին նա գտնվում էր վերակենդանացման բաժանմունքում`ծանր վիճակում, և բժիշկները շարունակում էին պայքարել նրա կյանքի համար։ Ցավոք, մարտի 21-ին արձանագրվել է երեխայի կենսաբանական մահը»,-ասվում է հաղորդագրության տեքստում։
ՀՀ առողջապահության նախարար Անահիտ Ավանեսյանը մարտի 19-ին հայտնել էր, որ դաժան ծեծի ենթարկված մեկամյա երեխայի առողջական վիճակը գնահատվում է ծայրահեղ ծանր:
Դեպքի առթիվ ՀՀ քննչական կոմիտեի Երևան քաղաքի քննչական վարչությունում սպանության փորձի հատկանիշներով նախաձեռնված է քրեական վարույթ։ Կալանավորվել է երեխայի խորթ մայրը:
The post Խորթ մոր կողմից ծեծի ենթարկված 1, 2 տարեկան երեխան մահացել է. բժշկական կենտրոն first appeared on MediaLab Newsroom-Laboratory.