Вучич: Учинчи жаҳон уруши аломатлари кўринмоқда

Сербия президенти Александр Вучич жаҳондаги геосиёсий вазиятга доир кескин баёнот бериб, ҳозирги жараёнларни Учинчи жаҳон урушига ўхшатди. Унинг таъкидлашича, ҳозирги воқеаларга ўхшаш воқеалар дастлабки икки жаҳон урушининг бошида ҳам содир бўлган.

Давлат раҳбари таъкидлашича, тарихга назар ташланса, Биринчи жаҳон уруши ва Иккинчи жаҳон уруши бошланишидан олдин ҳам шунга яқин сиёсий ва ҳарбий қарама-қаршиликлар юзага келган. Унинг айтишича, бугунги кунда ҳам глобал майдонда катта давлатлар ўртасида таъсир доираси ва ресурслар учун кураш кучайиб бормоқда.

Вучичнинг сўзларига кўра, ҳозирги геосиёсий қарама-қаршиликда бир томонда АҚШ, Буюк Британия, Исроил ва Европа Иттифоқи турса, иккинчи томонда Россия, Эрон ҳамда Хитой каби давлатлар жойлашган.

У яна қайд этишича, Яқин Шарқдаги бошқа мамлакатлар ҳам яқин вақт ичида ушбу қарама-қаршиликка жалб қилиниши мумкин. Бу эса минтақадаги вазиятни янада мураккаблаштириши эҳтимолини оширади.

Шу билан бирга, Австралия ва Жанубий Корея каби давлатлар ҳам АҚШ томонида туриб, Россияга қарши қурол-яроғ етказиб бериш орқали билвосита иштирок этаётганини таъкидлади.

Кузатувчилар фикрича, бундай кескин баёнотлар халқаро муносабатлардаги таранглик кучайиб бораётганини кўрсатади ва глобал хавфсизлик масалалари янада долзарблашганини англатади.