Զելենսկին, Խարկովում ծանր ռազմական իրավիճակի ֆոնին, չեղարկել է այցերն Իսպանիա և Պորտուգալիա
Ուկրաինայի նախագահ Վլադիմիր Զելենսկին չեղարկել է իր այցերը Իսպանիա և Պորտուգալիա, որոնք պետք է կայանային այս շաբաթվա վերջին, գրում է SIC Notícias-ը։
Ինչպես հաղորդում է CNN Portugal-ը, ուղևորությունների չեղարկման պատճառը եղել է ռազմաճակատում ստեղծված ծանր իրավիճակը։
«Ուկրաինական պետության ղեկավարի շրջապատը հավանաբար հասկացել է, որ ռազմաճակատի մի քանի հատվածներում, մասնավորապես՝ Խարկովում տիրող ծանր իրավիճակը, ներկայումս չի խրախուսում արտասահման մեկնելը»,- գրում է հրատարակությունը։
Զելենսկին պետք է Իսպանիա այցելեր ուրբաթ՝ մայիսի 17-ին։ Մադրիդում նախատեսված էր Ուկրաինայի նախագահի և Իսպանիայի թագավոր Ֆելիպե VI-ի հանդիպումը։ Սպասվում էր նաև, որ Զելենսկին կհանդիպի Իսպանիայի վարչապետ Պեդրո Սանչեսի հետ՝ անվտանգության երկկողմ համաձայնագիր ստորագրելու համար։ Մինչդեռ Լիսաբոնում Զելենսկին, ըստ SIC Notícias-ի, պետք է ստորագրեր անվտանգության երաշխիքների վերաբերյալ երկկողմ համաձայնագիր։
Մայիսի 10-ին ռուսական զորքերը նոր հարձակում են սկսել Խարկովի մարզում։ Հաջորդ օրը ՌԴ ՊՆ-ն հայտնել է հինգ գյուղի, ապա մի քանի գյուղի գրավման մասին։ Ուկրաինայի Զինված ուժերի գլխավոր հրամանատար Ալեքսանդր Սիրսկին խոստովանել է, որ իրավիճակն այս հատվածում զգալիորեն վատացել է, և մայիսի 14-ի երեկոյան Ուկրաինայի զինված ուժերի գլխավոր շտաբը հայտնել է, որ ուկրաինացի զինվորականները «տեղափոխվել են ավելի շահեկան դիրքեր» Վոլչանսկի և Խարկովի մարզի հյուսիսում գտնվող Լուկյանցի գյուղի տարածքում։