ՈւԵՖԱ-ն կարող է որակազրկել թուրք ֆուտբոլիստին՝ ծայրահեղ ազգայնական ժեստի համար
Թուրքիայի ֆուտբոլի ազգային հավաքականի պաշտպան Մերիհ Դեմիրալը կարող է որակազրկվել «Եվրո-2024»-ից ծայրահեղ ազգայնական ժեստի համար, հայտնում է գերմանական Bild թերթը:
Եվրոպական ֆուտբոլային ասոցիացիաների միությունը (ՈւԵՖԱ) ժեստի պատճառով հետաքննություն է Դեմիրալի նկատմամբ:
«ՈւԵՖԱ-ի Կարգապահական կանոնակարգի համաձայն՝ հետաքննություն է սկսվել թուրք ֆուտբոլիստ Մերիհ Դեմիրալի ենթադրյալ ոչ պատշաճ պահվածքի կապակցությամբ: Այս հարցի վերաբերյալ լրացուցիչ տեղեկատվություն կտրամադրվի ժամանակին»,- ասված է ՈւԵՖԱ-ի հաղորդագրությունում։
Bild-ը հիշեցնում է, որ երեքշաբթի Թուրքիայի հավաքականը «Եվրո-2024»-ի ⅛-րդ եզրափակիչում 2:1 հաշվով հաղթել է Ավստրիային։ Երկու գոլն էլ խփել է Դեմիրալը։ Տոնելով երկրորդ գոլը՝ նա ցույց է տվել «գորշ գայլերի» ողջույնի ժեստը, որը գայլի գլուխ է հիշեցնում։ Դա թուրքական ծայրահեղ ազգայնական Bozkurtlar («Բոզքուրթ» կամ «Գորշ գայլեր») կիսառազմական խմբավորման խորհրդանիշն է։ Խմբավորումը հավատարիմ է ռասայական գերազանցության, հայատյացության, հակասեմականության և իսլամիզմի գաղափարախոսությանը, նկատում է աղբյուրը:
«Իհարկե, շատ ուրախ եմ, որ երկու գոլ խփեցի. այն, թե ինչպես եմ դրանք տոնել, կապված է իմ թուրքական ինքնության հետ: Ես մարզադաշտում տեսա մարդկանց, որոնք նույնպես այս ժեստն արեցին: Հուսով եմ, որ այս ժեստն անելու ավելի շատ հնարավորություններ կունենամ: Որևէ քողարկված իմաստ չկա: Ես պարզապես ուզում էի ցույց տալ, թե որքան երջանիկ եմ»,- արդարացել է Դեմիրալը։
Այժմ ՈւԵՖԱ-ն կարող է հեռացնել Դեմիրալին խաղերից:
Նշենք, որ Ավստրիայում պաշտոնապես արգելված է «գորշ գայլի» ողջույնի ժեստը։