Բոլորն էլ կարող են սխալվել․ Տեն Հագը՝ Սանչոյի հետ կապված իրավիճակի մասին
Էրիկ տեն Հագը մեկնաբանել է Ջեյդոն Սանչոյի հետ կապված իրավիճակը։ Անգլիացի վինգերն անցած տարվա օգոստոսից ի վեր իր առաջին խաղն անցկացրեց «Մանչեսթեր Յունայթեդի» կազմում «Ռեյնջերսի» դեմ մինչմրցաշրջանային ընկերական խաղում (2-0):
Անցած մրցաշրջանի երկրորդ կեսը նա վարձավճարով անցկացրեց Դորտմունդի «Բորուսիայում»՝ սոցիալական ցանցերում Էրիկ տեն Հագին հրապարակայնորեն քննադատելուց հետո:
«Մենք լավ զրուցեցինք: Բոլորը կարող են սխալվել։ Եթե խաղացողը գիտակցում է դա, պետք է գիծ քաշել և առաջ շարժվել։
Այս ակումբին լավ խաղացողներ են պետք, և մի բան հաստատ է՝ Ջեյդոն Սանչոն շատ լավ խաղացող է։ Հուսով եմ, որ մեզ մոտ ամեն ինչ կստացվի, և նա կնպաստի մեր հաջողությանը»,- ասել է «Մանչեսթեր Յունայթեդի» գլխավոր մարզիչը։