Ուկրաինայի ամբողջ տարածքում օդային տագնապ է հայտարարվել, Կիևի և Սումիի մարզերում պայթյուններ են որոտացել
Ուկրաինայի ամբողջ տարածքում օդային ռմբակոծման նախազգուշացում է հայտարարվել։ Այս մասին հաղորդում է ՌԻԱ Նովոստին՝ հղում անելով Ուկրաինայի թվային փոխակերպման նախարարության առցանց քարտեզներին։
Առցանց քարտեզների տվյալներով՝ օդային տագնապի ազդանշանն Ուկրաինայի տարբեր մարզերում սկսել է հնչել տեղի ժամանակով 06։03-ից (Երևանի ժամանակով՝ 07։03)։
Օդային հարձակման նախազգուշացման ֆոնին Կիևի և Սումիի մարզերում պայթյուններ են որոտացել։ Այս մասին հաղորդում է ուկրաինական Телеграф հրատարակությունը՝ մանրամասնելով, որ վերոնշյալ շրջաններում հակաօդային պաշտպանության համակարգեր են գործարկվել։
Ռուսաստանի զինված ուժերի ուկրաինական ենթակառուցվածքի վրա հարձակումները սկսվել են 2022 թվականի հոկտեմբերի 10-ին՝ Ղրիմի կամրջի վրա տեղի ունեցած ահաբեկչությունից երկու օր անց, որի հետևում, ըստ Ռուսաստանի իշխանությունների, կանգնած են ուկրաինական հատուկ ծառայությունները։ Հարվածները հասցվում են ամբողջ երկրի էներգետիկայի, պաշտպանական արդյունաբերության, ռազմական հրամանատարության և կապի օբյեկտներին։