Եթե ուսուցիչը նույնիսկ 100 տոկոս արդյունքով հանձնել է կամավոր ատեստավորումը, պետք է նաև վերապատրաստվի 5 տարվա կտրվածքով. Փաշինյան (տեսանյութ)
Կառավարության որոշմամբ փոփոխություններ արվեցին ուսուցիչների վերապատրաստման կարգում:
ԿԳՄՍ նախարար Ժաննա Անդրեասյանի ներկայացմամբ՝ բոլոր ուսուցիչներին մեկ միասնական ծրագրով վերապատրաստման համակարգը փոխարինվել է ըստ գնահատված կարիքի վերապատրաստման համակարգով:
Նա նշեց, որ նոր մոտեցմամբ յուրաքանչյուր ուսուցիչ նախևառաջ ինքն է գնահատում իր մասնագիտական զարգացման կարիքները, այնուհետև նաև այդ գնահատումն իրականացնում է դպրոցը: Գնահատված կարիքի հիման վրա ուղղորդվում է, թե որ ուղղությամբ և որ մակարդակի վերապատրաստման կարիք ունի տվյալ ուսուցիչը, ինչի շնորհիվ հնարավոր է լինում ուսուցչի վերապատրաստումը դարձնել ավելի թիրախային և արդյունավետ:
«Այս տարի համակարգը կիրառվել է առաջին անգամ, գնահատվել են ավելի քան 6,000 ուսուցիչ, որոնք առաջիկայում պետք է վերապատրաստվեն: Այս փոփոխությունների արդյունքում շատ ավելի հստակ է դառնում ուսուցչի վերապատրաստման պարբերականության որոշման հարցը: Ընդ որում, շրջափուլն ավելի կարճ է ավելի ցածր մակարդակի պարագայում, ավելի երկար է, երբ մենք ունենք ավելի բարձր մակարդակ: 1-ին դեպքում շրջափուլը մեկ տարի է, 2-րդի դեպքում կարող է հասնել մինչև 5 տարվա»,- ասաց նա:
Բացի այդ, նախագծով հստակեցվում է նաև սկսնակ ուսուցիչների՝ այսինքն մինչև 5 տարվա փորձառություն ունեցող ուսուցիչների, կարիքների գնահատման և վերապատրաստման դրույթը, որով այս խմբի ուսուցիչներին ավելի թիրախային աջակցություն է ցուցաբերվում:
Վարչապետ Նիկոլ Փաշինյանն էլ հետաքրքրվեց՝ այս փոփոխությունը ճի՞շտ եմ հասկանում, որ այլոց շարքում մենք նպատակ ունենք նաև ուսուցիչներին նախապատրաստել կամավոր ատեստավորման գործընթացին:
«Մենք, ըստ էության, ասում ենք, որ եթե ուսուցիչը նույնիսկ 100 տոկոս արդյունքով հանձնել է կամավոր ատեստավորումը, սա չի նշանակում, որ չպետք է վերապատրաստվի: Նա պետք է վերապատրաստվի 5 տարվա ընթացքում, օրինակ, որ նոր տեխնոլոգիաներ, նոր գիտելիքներ, նոր մեթոդներ սովորի: Այսինքն մանկավարժության զարգացումների հետ իրեն դարձնենք հնարավորինս համահունչ»,- ասաց նա:
Անդրեասյանն էլ արձագանքեց․ «Այո, պարո՛ն վարչապետ, ճիշտ եք ամոբղջությամբ»:
Մանրամասները՝ տեսանյութում: